А.Қыраубаеваның 70 жылдығына арналған «Ұлттық мектеп моделі: авторлық мектептер тәжрибелері» атты педагогикалық жәрмеңке өткізу туралы

«Шығармашылық шеберлікке баулу орталығы» ЖШС «Ұлттық мектеп моделі: авторлық мектептер тәжрибелері» атты сырттай педагогикалық жәрмеңке өткізеді.

Аталған шара тәуелсіз еліміздегі алғашқы ұлттық мектеп моделін қалыптастырушы, «Сенім» оқу-тәрбие бағарламасының авторы, қазақ гуманитарлық мәдениеті лицейін ашушы әйгілі ғалым, филология ғылымдарының докторы, профессор Алма Мүтәліпқызы Қыраубаеваны еске алу, ұлағатты ұстаздың еңбектерін насихаттау мақсатында ұйымдастырылады.
Мақсаты: Білім мазмұнын жаңарту жағдайындағы білім беру ұйымдарындағы ұлттық-рухани құндылықтарға бағытталған оқу-тәрбие жұмысының жүйеленуіне ықпал ету және педагог қызметкерлердің біліктілігін арттыру, өзара тәжірибе алмасу.
Міндеттері:
• Тәрбиенің тұжырымдамалық негіздерін жүзеге асыру;
• Білім беру ұйымдарының оқу-тәрбие үдерісін ұйымдастырудағы жүйеленген үлгілері мен тәрбие жұмысын ұйымдастырудың озық тәжірибелерін анықтау, насихаттау, тарату;
• Білім беру ұйымдарындағы «Тәрбие орталықтары» мен «Ата-аналар мектептері» жұмыстарын насихаттау.
• Тәрбие мәселелері бойынша білім беру ұйымдары мамандарының кәсіби құзыреттіліктерін арттыру.
Қатысушылар: шығармашыл ұстаздар - мектепке дейінгі және жалпы білім беретін ұйымдар, қосымша білім беру ұйымдары, колледждер мамандары, тәрбиешілер, мұғалімдер
Жәрмеңке сырттай ұйымдастырылады. Материалдарды қабылдау: 2017 жылғы 15 қазанға дейін.
Жәрмеңгеке ұсынылатын жұмыстар:
1) Білім беру ұйымдарының оқу-тәрбие үдерісін ұйымдастырудағы жүйеленген үлгілері.
2) Тәрбие жұмысының стратегиялық бағдарламалары мен 3 жылдық жоспарлары іс-әрекет нәтижелерімен қос беріледі.
3) Ұлттық-рухани құндылықтарды насихаттаушы ерекше мазмұнды авторлық бағдарламалар (қолданбалы курс, үйірме жұмысы, жүйеленген жылдық сынып сағаттары, т.б.)
4) Ұлттық-рухани құндылықтарды насихаттаушы ерекше мазмұнды сабақ үлгісі. Оқытудың тәрбиелік құрамдасын дамытуға арналған авторлық жоспарлар.
5) Ұлттық-рухани құндылықтарды насихаттаушы ерекше мазмұнды іс-шаралар әзірлемесі (сынып сағаты, сыныптан тыс жұмыс, мерекелік шара, даталы күн әзірлемесі т.б)
Келіп түскен жұмыстар мазмұнына қарай іріктеледі.
Келіп түскен жұмыстар мынадай номинациялар бойынша сарапталады:
- «Ұлттық мектеп үлгісі», білім беру ұйымдарының стратегиялық даму жоспарланрының рухани құндылықтарды насихаттауға бағытталуы. Ерекше қызмет үлгілері. Жүйеленген жұмыстар мысалдары.
- «Дәстүрлі мектеп» үлгісі, білім беру ұйымдарының оқу-тәрбие үдерісін ұйымдастырудың ұлттық құндылықтарға негіздей жүйеленген тәрбие үлгілері. Мектептің ерекше дәстүрінің қалыптасуы. «Тәрбие орталықтары», «Ата-аналар мектебі», «Ақсақалдар алқасы» т.б. бірлескен шығармашылық жұмыстар үлгілері.
- «Шығармашыл ұстаз – пән мұғалімі» пәннің тәрбиелік мәнін, оқушының функционалдық сауаттылығын арттыруға бағытталған сабақ жоспарлары, топтамалары.
- «Шығармашыл ұстаз – қосымша білім беру педагогі» қосымша білім беруді ұйымдастырудың ерекше мазмұнды үлгілері. Үйірме, қолданбалы курстар т.б. авторлық бағдарламалары (қолданбалы курс, үйірме жұмысы, т.б)
- «Шығармашыл ұстаз – сынып жетекшісі», сыныптан тыс жұмыстардың ерекше мазмұнды, ұлттық құндылықтарды насихаттауға бағытталған үлгілері. Жүйеленген жоспарлары, сынып сағаттары, жеке әзірлемелер т.б.
Жұмыс мазмұнын ашып көрсететін дәлелді материалдар қосымша ұсынылады: бейнежазбалар, әдістемелік материалдар, дисктер, слайдтық таныстырылым т.б. материалдар авторлық құқықтарымен республикаға тарату мақсатында сұралады. Материалдар жинағы шығарылады.
Тікелей қатысушылар үшін іс-сапар шығындары қатысушы ұйым тарапынан.
Электронды мекен-жайымыз: www.shshbo.kz, Этот адрес электронной почты защищен от спам-ботов. У вас должен быть включен JavaScript для просмотра..

 

 «Ұлттық ойын – бабалар мұрасы» атты мектепішілік асық ойынының ережесі

Қазақстан Республикасы Білім және ғылым министрінің 2015 жылғы 22 сәуірдегі № 227 бұйрығымен бекітілген «2015-2020 жылдарға арналған Тәрбиенің тұжырымдамалық негіздерін іске асыру жөніндегі іс-шаралар жоспарын жүзеге асыру» және ұлттық құндылықтарды насихаттау мақсатында мектеп оқушыларының арасында өткізілетін асық ойынының мектепішілік жарыстары ережелерін анықтайды.

«Асық ату» ұлттық ойынын өткізудегі мақсат


«Асық ату» ұлттық ойынын көпшілікке тарату бойынша мектеп ішілік жарыс оқушылар мен ата-аналардың, ұстаздар қауымының ұлттық салт-дәстүрге қызығушылығын арттыру, ата-баба мұраларына құрметпен қарау дағдыларын қалыптастыру.

«Асық ату» ойына қатусушылар
1. Мектеп оқушылары (жас ерекшеліктері бойынша іріктеледі) арасындағы жарыс;
2. Ата-аналар арасындағы жарыс;
3. Ұстаздар арасындағы жарыс болып бөлінеді.
Жарысты ұйымдастырушылар: педагог ұйымдастырушы және дене шынықтыру пәнінің мұғалімдері.

Ойын түрлері
Алғашқы кезеңге асық ойынының «Үш табан», «Шеңберден шығару», «Көтеріспек» (тигізбекіл), «Омпы» түрлерін аламыз.
Ойындарындағы бірінші шарт - кезек анықтау. Кезекті төреші анықтайды.
Төреші - ойынның әділ жүруін қадағалаушы адам. Ол дене тәрбиесінің мұғалімі немесе асық ойынын жақсы білетін кез-келген адам бола алады.
Кезек анықтау ережесі: Төреші ойынға қатысушылардың сақаларын бір қолға жинап, шиырып шашу арқылы анықтап алады. Кімнің сақасы бірінші болып алшысынан түссе, асықты сол бірінші, ал егер бір сақа -алшы, тағы бір сақа тәйкі түссе, тәйкі түскеннің иесі екінші болады. Мысалы, қатысушы 4 бала болса, сақаларды шиыра шашқанда бір алшы, бір тәйкі түссе, олар сәйкесінше бірінші, екінші кезекті алады да, қалған екі сақа тағы шиырылады. Қайсысы бірінші алшы не тәйкі түссе, сол үшінші болады.
Бір ескеретіні: сақаларды шиырып шашқанда, біреуі ғана тәйкі тұрып, қалғандары бүк не шік түссе, бірінші кезекті тәйкі тұрған сақаның иесі алады. Ал егер екі сақа бірдей тәйкі не алшы түссе, онда сол екі сақа жеке иіріледі. Қайсысы алшы не тәйкі тұрады, кезек соныкі, ал екеуі де тұрмаса, қалған сақаларға қосып, қайта иіріледі. Сақасы тұрмаған соңғы бала түпте қалады. Түп - атуға тізілген асықтардың (түбі) жаны деген сөз.

Ойын ережелері
Үш табан - 2 немесе 3-4 бала (төрттен көп болмағаны жөн) 1 (2) асықтан тізіп ойнайтын ойын.
Кімнен кейін кім екені жоғарыдағыдай амалмен анықталғасын, бірінші бала тізілген асықтардың бір жақ бетіне шығып, қашықтау (тізілген асықтан есептегенде 2,5 -3 метрден алыс болмауы керек) жерге сақасын иіреді. Сақасы алшы немесе тәйкі тұрса, тізілген асықтарды атады. Атқанда асыққа тигізіп қана қоймай, оны табанмен санағанда (адым емес) 3 табан қашықтықтан асыра ұшыруы тиіс. Сонда ғана ол ұшырған асығын алады және ойынды жалғастырып, сақасы тоқтаған жерден тағы атады. Егер тигізе алмай қалса, сақасы тоқтаған жерінде тұрады. Кезекті екінші бала алады. Ол біріншіге қарама-қарсы жаққа барып, сақасын иіреді, (сақасы тұрса, асықты атады) немесе түптен, яғни өкшесін асық тізілген сызықтан қойып тұрып, бірінші баланың сақасын көздеп атуына болады. Егер ол біріншінің сақасына тигізіп, 3 табан өлшемнен асыра ұшырса, бірінші бала ойыннан шығады да, ортаға тізілген асықтардың біреуі екінші балаға тиесілі болады. Ол да ойынды сақасы тоқтаған жерден жалғастырып, тізілген асықтарды атады. Тиген асығын тиісті қашықтыққа ұшырса, алады. Тигізе алмаса, бірінші сақаны «күйдірген» ақысына бір асығын алады. Үшінші бала да қаласа, екіншінің сақасын атады. Қаламаса, екіншінің сақасына қарама-қарсы, тізілген асықтардың екінші жағына 2,5-3 метр қашықтықта сақасын иіреді. Алшы не тәйкі тұрса, тізілген асықты атады. Сақасы тұрмаса, түскен жерінде тұрады. Енді алдыңғы екеудің бірінің сақасын ату құқығына түптегі бала ие болады. Бірақ оның таңдау құқы бар. Қаласа, түптен үш табан салып, санайды да сол жерден әлгі сақаны атады. Қаламаса, түпке сақасын иіреді. Егер алшы/тәйкі тұрса, түптегі асықтарды шертуге құқық алады. Бұл іс жүзінде ұтысты білдіреді. Өйткені, асық ойынында шерту ең оңай тәсіл саналады. Егер сақасы тәйкі не алшы тұрмаса, ойыннан шығып қалмаған балалар кезек ретімен асықты атады. Бұл кезде де жоғарыда айтылған тәртіп ереже-сақталады. Тек бірінші атқан бала асыққа тигізе алмай қалса, сақасы барған жақта тұрған екінші бала қаласа, әлгінің сақасын «күйдіреді», қаламаса ортадағы асықты атады. Ал түптегі бала екі жақтағы сақаның жақын түскенін өзіне сенсе, атуына болады, бірақ бұл жолы үш табан салмай, түптен тұрып атады. Ойын осылай тізілген асық біткенше жалғаса береді. Мұндайда бірінші не екінші бала мерген болса, ойын кейде 2-3 минутқа ғана жалғасады.

Шеңберден шығару. Ойын шарты бойынша диаметрі 1,5-2 метрлік, кейде одан да үлкен шеңбер сызылады. Қатысушы балалар шеңбердің дәл ортасына (5-6 бала болса, бір-бірден, 2-3 бала болса, екі асықтан) бір-бірден асық тізеді. Тағы да сақаларын бір қолға жинап, шиыра шашады. Шарт бірінші ойындағыдай. Ату кезегі сақаларының алшы/тәйкі тұруына қарай анықталады. Сосын шеңберден ортасында тізілген асықтан есептеп, екі жаққа қарай адыммен 4-5 қадам жасап, белгі сызады да, сол сызықтан тұрып кезегімен шеңбердің ортасында тізілген асықтарды атады.
Шарт бойынша ортадағы асықты шеңбер сыртына атып шығарған бала (бір атқанда екі асықты шығарса да мейлі) алады және ойынды сақасы түскен жерден жалғастырады. Бірінші атуында сақасы бір немесе 2-3 асықты құлатып кеткен болса, алдымен соның бірін атады. Атқан кезде шеңберден шықпай қалған мұндай асықтар «өлік» деп аталады. Олар ортаға қайта тізілмейді. Егер бірінші бала «өлікті» де шеңберден шығара алмай қалса, қалған балалар кезегімен шеңберден келіп атады. Онда да бірінші кезекте тізіліп тұрған асықтарды емес, «өлікті» атады. «Өлікті шығарғаны сақасы тоқтаған жерден тізіліп тұрған асықтарды атады. Сыртқа шығарса, асығын алады да тағы атады. Шығара алмаса, өзінен кейінгі бала шеңберден тұрып, «өлікті», ол жоқ болса, тізілген асықтарды атады. Ойын барысында «өлік» асық шеңберге тым жақын болып қалса, табан салып өлшейді. Егер шеңбер мен асықтың арасы бір табаннан жақын болса, ол асықты сол жерден шеңбердің тура қарсы бетіне қарай шертіп шығаруға болады. Егер шерте алмайтын болса, «өлікті» алып, тура шеңбер сызығына омпысынан қояды да, шеңбердің қарсы бетінен тұрып атады. Ойын осы ретпен жалғасады. Кім асықты көп ұтса, сол жеңеді.

Тигізбекіл немесе көтеріспек. Мұны екі-үш бала ғана ойнайды.
Ойынды екі бала бір қатарда тұрып бастайды. Алдымен біреуі сақасын алыстау қашықтыққа иіріп (бірақ екі метрден алысқа лақтырмауы тиіс) тастайды. Екіншісі әлгі сақаны көздеп атады. Мақсат - тигізу. Егер тигізсе, бірінші бала екіншісін сақасы түскен жерге дейін арқалап барады. Сосын өзі атады. Тигізер болса, арқалау кезегі екіншіге келеді. Ойынды осылай белгілі бір межеге дейін (шағын спорт залдың бір жағынан екінші жағына дейін) немесе уақыт белгілеп ойнауға болады.
Жоғарыда біз асық ойынының ең көп таралған үш түрін ғана мысалға алып, солардың қарапайым ережелерін ғана айттық. Әлбетте, бұл ойын кең өріс алып, дамып жатса, оның ережелері де жетілдіріле беретіні анық. Өйткені, далада ойнауға қолайлы бұл ойындарды спорттық залдарға бейімдеу кезінде артық-кем тұстары түзелуі тиіс. Көп болып кірісіп, жан-жақты қолдау көрсете алсақ, уақыт өте келе телекамералардың мүмкіндігін пайдаланып, республикалық деңгейге де көтеруге болар еді. Себебі бұл ойынының көрермені көп болатынына сенім мол.

«Омпы» ойыны. Асық ойынына қой, арқар, құлжа сияқты жануарлардың асығы мен тайынша-торпақтың топайларынан өңделіп пайдаланылады. Үлкендер де, балалар да ойнайды. Асық ойыны барысында әсіресе, ұтыстың негізгі шарттарының бірі – асықтың алшы түсуіне айырықша мән берілді. Сондықтан алшы түсуге икемді ірі, шомбал еркек қойдың және арқар мен құлжаның асықтары, әсіресе, осы асықтардан жасалған сақалар жоғары бағаланды. Аса тиімді атыс асықтарының қатарына кеней мен топай (жылқы мен тайыншаның топайынан басқа) деп аталатын сақалардың шағын түрлері де жатқызылды. Қазақы ортада сақалар құнды бұйым ретінде ойыншылардың арасында әртүрлі айырбасқа түсіп отырды. Мысалы, бір сақа екі асыққа айырбасталды. Ал құлжаның сақасы үш асыққа тең болған деген сияқты. Ойыншылар асықтың күтіміне ерекше мән берді. Әсіресе, әртүрлі түске боялған асықтар да жоғары бағаланды. Қазақ әйелдері жүн бояғанда бояудың басыртқысына немесе қалған қалдығына асықтарды салып, сәл қайнатып бояп беретін болған.

Жарысты ұйымдастыру
Жарыс әр мектептің өз базасында өтеді. Жарыс жеңімпаздарына және ұйымдастырушаларына «Шығармашылық шеберлікке баулу орталығының» алғыс хаттары мен Дипломдары табыс етіледі.
Ойынның өткізілу уақыты мен барысы туралы мына мекен – жайларға хабарласуға болады:
Эл.пошта: Этот адрес электронной почты защищен от спам-ботов. У вас должен быть включен JavaScript для просмотра.

2016 жылғы 16 желтоқсанда Қазақстанның тәуелсіз, егеменді елдігіне 25 жыл толады! Бұл күн біртұтас елдіктің, өткенге деген тағзымды салауат пен болашаққа деген сенімді үміттің мерекесі! Еліміздің ұлы тарихына, ата-баба рухына, аға ұрпақтардың қаһармандық өмір жолына құрметпен басымызды иетін күн! Тәуелсіздік - ұлттық мереке!
Қазақстан Республикасы тәуелсіздігінің 25 жылдығына орай мектеп оқушылары арасында «Өлкеңді тану – өзіңді тану» тақырыбында танымдық экспедиция ұйымдастыруды ұсынады.

 

«Өлкеңді тану – өзіңді тану!» тақырыбында танымдық экспедицияны ұйымдастыру ережесі

Жалпы ережелер


Бұл ереже Қазақстан Республикасы тәуелсіздігінің 25 жылдығына орай мектеп оқушылары арасында өткізілетін «Өлкеңді тану – өзіңді тану» тақырыбындағы танымдық экспедицияның мектеп ішінде өткізілу шарттарын анықтайды.

Танымдық экспедицияның мақсаты мен міндеттері


Танымдық экспедицияның мақсаты оқушылардың бойындағы еліне, туған жеріне деген сүйіспеншілікті арттыру. Оқушыларды республика аймақтарымен толық таныстыра отырып, әр өңірдегі табиғи, тарихи, мәдени, этнографиялық құндылықтарды зерделеуіне мүмкіндік беру.
Шараның идеологиялық мазмұны төмендегідей міндеттерді қамтиды:
• Еліміздің аймақтарындағы үлкен қалаларды, елді мекендерді, тарихи орындарды, қасиетті жерлерді, архитектуралық ескерткіштер мен мәдени мұра құндылықтарын білуге насихаттау.
• Оқушылардың санасына әр өңірдің тарихи қалыптасуы, ондағы тұлғалардың (хандар, билер, көсемдер, шешендер, батырлар, жыраулар т.б.) ықпалы туралы және мемлекеттілік пен тәуелсіздіктің құндылықтарын қалыптастыру.
• Қазақстанның елді мекендеріндегі табиғи көрікті мекендер, табиғат ескерткіштері мен табиғи қорықтарды, олардың фаунасы мен флорасын танып білуіне ықпал ету, туған еліне деген мақтаныш сезімін қалыптастыру.
• Аймақтардың табиғат ерекшеліктерін байланысты еңбек түрлері, олардың даму тарихы мен бүгіні туралы ақпараттар алмасуға жағдай жасау.
• Аймақтардағы дәстүрлі өнер (ән, би, шешендік, жыраулық, айтыс, ұлттық ойын, спорт т.с.с.) түрлерінің ерекшеліктерін сараларуға мүмкіндік туғызу.
• Қоғамдық белсенділігі жоғары, елінің маңызды мәселелерін шешуге, оның тағдырына деген жауапкершілікті өзіне алуға қабілетті құқықтық мемлекеттің азаматын қалыптастыру.

Танымдық экспедицияға қатысушылар


Мектеп оқушылары қатысады. Жас ерекшеліктерін ескере отырып тапсырмалар 1-4 сынып, 5-9 сынып, 10-11 сыныптарға беріледі.
Шара алдымен сыныпта өткізіледі. Қорытынды бөлімі мектепішілік үлкен шарада тыңдалады.

Танымдық экспедицияның өткізілу тәртібі
Сыныптар арасында 14 облыс, Алматы және Астана қалалары, «¥лы даланың астаналары» бөлініп беріледі.

Тапсырмалар:
1-4 сыныптар үшін (ересектердің көмегімен):
• Берілген аймақ туралы толық ақпарат жинау, фильмдер көру.
• «Табиғат тамашалары» тақырыбындағы оқушылардың суреттерінің көрмесін ұйымдастыру (берілген аймақ табиғаты).
• Сол өңірден шыққан тұлғалар, танымал адамдар туралы материалдар жинақтау.
• Өздеріне «Менің өлкем» тақырыбында эссе жаздыру.
Қорытындылау:
• Картадағы орнын көрсете отырып слайдтар арқылы көрсетілім немесе фильм.
• Географиялық орны, табиғаты, мәдени, тарихи байлығын т.б. көрсету.
• Аймақ туралы ақын-жазушылардың өлең-жырларын жинақтап, оқыту, жатқа айтқызу. (Өзге де ерекше шығармашылық жұмыстарға мүмкіндік беріледі)

5-8 сыныптар үшін (ата-аналармен бірлесе жасауға болады):
• Берілген аймақ туралы толық ақпарат жинау, фильмдер көру, кітапхана, мұрағат материалдарын қарастыру.
• «Тарих толқынында» тақырыбында сол өңірдің тарихынан сыр шертетін материал әзірлеу (тұлғалар, тарихи-мәдени ескерткіштер т.б. қамтылады). (слайдтар арқылы, бенебаян, т.с.с.)
• «Тамаша табиғат» табиғи әсем аймақтары мен табиғи ескерткіштерін жинақтау, (слайдтар арқылы, бенебаян, т.с.с.)
• «Қасиетті өлкем» шығармалар байқауын ұйымдастыру.
Қорытындылау:
• Картадағы орнын көрсете отырып слайдтар арқылы көрсетілім немесе фильм.
• Географиялық орны, табиғаты, мәдени, тарихи байлығын т.б. көрсету.
• «Аймақтағы шаруашылық тарихы. Кеше.Бүгін. Болашақта».
• Аймақ туралы оқушылардың шығармашылық жұмыстары (суреттер көрмесі, үздік шығармалар, өлең-жырлар, эсселер т.б)
• Аймақтың мәдениетіне қатысты осы өлкедегі мақаммен ән айту, жыр оқу, аймаққа тән дәстүрлі өнер түрлерін көрсету.

9-11 сыныптар үшін (ата-аналармен бірлесе жасауға болады):
• Берілген аймақ туралы толық ақпарат жинау, фильмдер көру, кітапхана, мұрағат материалдарын қарастыру.
• «Тарих толқынында» тақырыбында сол өңірдің тарихынан сыр шертетін материал әзірлеу (тұлғалар, тарихи-мәдени ескерткіштер т.б. қамтылады). (слайдтар арқылы, бенебаян, т.с.с.)
• «Тамаша табиғат» табиғи әсем аймақтары мен табиғи ескерткіштерін жинақтау, (слайдтар арқылы, бенебаян, т.с.с.)
• «Кәсіп түбі - нәсіп» аймақтың ерекшелігіне байланысты шаруашылықтың дамуы туралы, кешегісі мен бүгінін қамтып ой-толғау жазу.

Қорытындылау:

• Картадағы орнын көрсете отырып слайдтар арқылы көрсетілім немесе фильм.
• Географиялық орны, табиғаты, мәдени, тарихи байлығын т.б. көрсету.
• Аймақ туралы оқушылардың шығармашылық жұмыстары (суреттер көрмесі, үздік шығармалар, өлең-жырлар, эсселер т.б)
• Аймақтың мәдениетіне қатысты осы өлкедегі мақаммен ән айту, жыр оқу, аймаққа тән дәстүрлі өнер түрлерін көрсету.

Танымдық экспедицияның әділ қазылар алқасы
Шараның қорытынды кезеңінде қатысушылар жұмысын бағалау үшін мектеп әкімшілігі, ата-аналар алқасы, қоғамдық ұйым өкілдері, білім бөлімі, оқыту орталықтарының мамандары, білім беру ұйымдарының жетекшілері, ЖОО оқытушыларынан құралған әділ қазылар алқасын тағайындайды.
Әділ қазылар алқасы қорытынды бөлімді саралайды, жеңімпаздарды анықтап, оларды марапаттайды.

Жеңімпаздарды марапаттау


Жоғарыда көрсетілген ереже талаптарына сай белгіленген өлшемдер бойынша қорытынды бөлімде жеңімпаздар анықталады.
Белгіленген жүлделер:
Бас жүлде –1
Бірінші орын – 1;
Екінші орын – 2;
Үшінші орын – 3;
Ынталандыру –.4.
Жеңімпаздар марапат қағаздары, дипломдармен марапатталады. Материалдық ынталандырулар болады.

 

Құрметті әріптестер!

Республикадағы білім беру саласы қызметкерлерінің кәсіби шығармашылығын шыңдау, біліктілігін арттыру, оларға педагогикалық-психологиялық, әдістемелік қолдау көрсету, жеке авторлық ізденісіне бағдар беру және балалардың тұлғалық дамуы мен дарындылық қабілеттерін ұштау мақсатында қызмет атқаратын «Шығармашылық шеберлікке баулу» орталығы 2015 жылдың 15 сәуірі күні «Ұстаздық еңбек: Тарих. Қоғам. Тұлға» тақырыбында республикалық конференция өткізеді.
Аталған шара ІІ-ші дүние жүзілік соғыстың аяқталуына 70 жыл және ардақты ұстаз, қоғам қайраткері, Қазақ ССР-нің еңбек сіңірген мұғалімі Асылхан Қасымбектің туғанына 100 жыл толуына орай ұйымдастырылуда.
Шараның басты мақсаты – ел басына күн туған кезеңде қолына қару алған майдангер-ұстаздардың ерлігі мен еңбегіне тағзым ету. Өскелең ұрпаққа бабалар өнегесін кеңінен насихаттау.
Қанды қырғынды бастан кешкен отандастарымыздың қатарында Ұлы Жеңіске үлес қосқан ұлтжанды азамат, еңбек ардагерінің өнегелі өміріне арналған бұл шара ұстаз еңбек еткен Балқаш ауданы, Миялы орта мектебінде атап өтіледі.
Конференция келесі бағыттар бойынша жұмыс жасайды:
1. Пәнді оқытудағы педагогтың жеке ізденісі.
2. Қосымша білімді (білім беру ұйымында және ұйымнан тыс мекемеде) ұйымдастырудағы педагогтың жеке ізденісі.
3. Мәдени көпшілік, спорттық іс-шараларды ұйымдастырудағы педагогтың жеке ізденісі
Қатысушылар үшін мынадай тақырыптар ұсынылады: «Ұстаз еңбегі: ізденіс пен нәтиже», «Ұстаз – тарихи тұлға», «Қоғам дамуындағы педагог рөлі», «Жеке ізденісім мен жаңашылдық қадамдарым», «Педагог тәжірибесі – қоғамдағы білім саласын дамытуға сүбелі үлес», т.т. немесе педагог өз қалауынша құра алады.
Конференция екі кезеңде өтеді:
1) 15. 04. 2015 жылы ардагер ұстаздың мектебінде конференция ұйымдастырылады.
2) Конференцияға қатысуға тілек білдірушілердің (Республика өңірінде) мақалаларын жинақтау, ой-пікірлерін жариялау жұмысы маусым айының аяғына дейін жалғасын табады.
Ұйымдастыру комитеті конференция материалдарын жинақ түрінде тамыз кеңесіне дейін жариялауды жоспарлайды. Жинаққа ену үшін материалдар (баяндама, мақала) 2015 жылдың 1 маусымына дейін электронды түрінде ұйымдастыру комитетіне жіберілуі қажет. Кері байланыс мекен-жайлары толық көрсетілуі тиіс.
Электронды пошта: Этот адрес электронной почты защищен от спам-ботов. У вас должен быть включен JavaScript для просмотра., Этот адрес электронной почты защищен от спам-ботов. У вас должен быть включен JavaScript для просмотра. , Этот адрес электронной почты защищен от спам-ботов. У вас должен быть включен JavaScript для просмотра.
Байланыс телефондары:+77073187140, +77758531701.
Ұйымдастыру комитеті мен редакциялық комиссияның мақалаларды іріктеу құқы бар.

Добавить комментарий


Защитный код
Обновить

Уроки создания сайта.